अथ अष्टमहीषियुक्तश्रीकृष्णस्तोत्रम्‌
हृद्गुहाश्रित पक्षींद्र-
वल्गुवाक्यैः कृतस्तव |

तद्गरुत्कंधरारूढ
रुग्मिणीश नमोऽस्तु ते || १||

अत्युन्नत्याऽखिलैः स्तुत्य
श्रुत्यंतात्यंतकीर्तित |

सत्ययोहित सत्यात्मन्
सत्यभामापते नमः || २||

जांबवत्याः कंबुकंठा-
लंबिजृंभिकरांबुज |

शंबुत्र्यंबकसंभाव्य
सांबतात नमोऽस्तु ते || ३||

नीलाय विलसद्भूषा-
जालायोज्ज्वलमालिने |

नीलालकोद्यत्फालाय
कालिंदीपतये नमः || ४||

जैत्रचित्रचरित्राय
शात्रवानीकमृत्यवे |

मित्रप्रकाशाय नमो
मित्रविंदाप्रियाय ते || ५||

बालनेत्रोत्सवानंत-
लीलालावण्यमूर्तये |

नीलाकांताय ते भक्त
पालायास्तु नमो नमः || ६||

भद्राय स्वजनाविद्या-
निद्राविद्रावणाय वै |

रुद्राणीभद्रमूलाय
भद्राकांताय ते नमः || ७||

रक्षिताखिलविश्वाय शिक्षिताखिलरक्षसे |

लक्षणापतये नित्यं
भिक्षुश्लाघ्याय ते नमः || ८||

षोडशस्त्रीसहस्रेशं
षोडशातीतमच्युतम्‌ |

ईडेत वादिराजोक्त-
प्रौढस्तोत्रेण संततम्‌ || ९||

|| इति श्रीवादिराजकृतं अष्टमहीषियुक्तश्रीकृष्णस्तोत्रम्‌ ||