ಆಮಂತ್ರಣೋತ್ಸವಸ್ತೋತ್ರಂ
ಅಥ ಆಮಂತ್ರಣೋತ್ಸವಸ್ತೋತ್ರಂ
ಆಮಂತ್ರಣಂ ತೇ ನಿಗಮೋಕ್ತಮಂತ್ರೈ-
ಸ್ತಂತ್ರಪ್ರವೇಶಾಯ ಮನೋಹರಾಯ |
ಶ್ರೀರಾಮಚಂದ್ರಾಯ ಸುಖಪ್ರದಾಯ 
ಕರೋಮ್ಯಹಂ ತ್ವಂ ಕೃಪಯಾ ಗೃಹಾಣ	||1||
ಸತ್ಯಾಧಿರಾಜಾರ್ಚಿತಪಾದಪದ್ಮ 
ಶ್ರೀಮಧ್ವಸಂಪೂಜಿತ ಸುಂದರಾಂಗ |
ಶ್ರೀಭಾರ್ಗವೀಸನ್ನುತಮಂದಹಾಸ 
ಶ್ರೀವ್ಯಾಸದೇವಾಯ ನಮೋ ನಮಸ್ತೇ	||2||
ಅನಂತರೂಪೈರಜಿತಾದಿಭಿಶ್ಚ 
ಪರಾದಿಭಿಃಶ್ರೀಬೃಹತೀಸಹಸ್ರೈಃ |
ವಿಶ್ವಾದಿಭಿಶ್ಚೈವ ಸಹಸ್ರರೂಪೈ-
ರ್ನಾರಾಯಣಾದ್ಯಷ್ಟಶತೈರಜಾದ್ಯೈಃ	||3||
ಏಕಾಧಿಪಂಚಾಶದಿತೈಶ್ಚ ರೂಪೈಃ 
ಶ್ರೀಕೇಶವಾದ್ಯೈಶ್ಚ ಚತುರ್ಸ್ಸುವಿಂಶೈಃ |
ಮತ್ಸ್ಯಾದಿಭಿಸ್ಸ್ವಚ್ಛದಶಸ್ವರೂಪೈ-
ರ್ವಿಶ್ವಾದಿಭಿಶ್ಚಾಷ್ಟಭಿರಗ್ರರೂಪೈಃ	||4||
ತಥಾಽನಿರುದ್ಧಾದಿಚತುಸ್ಸ್ವರೂಪೈ-
ರ್ಗೋಬ್ರಾಹ್ಮಣಶ್ರೀತುಲಸೀನಿವಾಸೈಃ |
ಮಂತ್ರೇಶರೂಪೈಃ ಪರಮಾಣುಪೂರ್ವ-
ಸಂವತ್ಸರಾಂತಾಮಲಕಾಲರೂಪೈಃ	||5||
ಜ್ಞಾನಾದಿದೈಸ್ಸ್ಥಾವರಜಂಗಮಸ್ಥೈ-
ರವ್ಯಾಕೃತಾಕಾಶವಿಹಾರರೂಪೈಃ |
ನಾರಾಯಣಾಖ್ಯೇನ ತಥಾಽನಿರುದ್ಧ-
ರೂಪೇಣ ಸಕ್ಷ್ಮೋದಗತೇನ ತುಷ್ಟೈಃ	||6||
ಪ್ರದ್ಯುಮ್ನಸಂಕರ್ಷಣನಾಮಕಾಭ್ಯಾಂ 
ಭೋಕ್ತೃಸ್ಥಿತಾಭ್ಯಾಂ ಭುಜಿಶಕ್ತಿದಾಭ್ಯಾಂ |
ಶ್ರೀವಾಸುದೇವೇನ ನಭಃಸ್ಥಿತೇನ 
ಹ್ಯಭೀಷ್ಟದೇನಾಖಿಲಸದ್ಗುಣೇನ	||7||
ಅಶ್ವಾದಿಸದ್ಯಾನಗತೇನ ನಿತ್ಯ-
ಮಾರೂಢರೂಪೇಣ ಸುಸೌಖ್ಯದೇನ |
ವಿಶ್ವಾದಿಜಾಗ್ರದ್ವಿನಿಯಾಮಕೇನ 
ಸ್ವಪ್ನಸ್ಥಪಾಲೇನ ಚ ತೈಜಸೇನ	||8||
ಪ್ರಾಜ್ಞೈನ ಸೌಷುಪ್ತಿಕಪಾಲಕೇನ 
ತುರ್ಯೇಣ ಮೂರ್ಧ್ನಿ ಸ್ಥಿತಿಯುಕ್ಪರೇಣ |
ಆತ್ಮಾಂತರಾತ್ಮೇತ್ಯಭಿಧೇನ ಹೃತ್ಸ್ಥ-
ರೂಪದ್ವಯೇನಾಖಿಲಸಾರಭೋಕ್ತ್ರಾ 	||9||
ಹೃತ್ಪದ್ಮಮೂಲಾಗ್ರಗಸರ್ವಗೈಶ್ಚ 
ರೂಪತ್ರಯೇಣಾಖಿಲಶಕ್ತಿಭಾಜಾ |
ಕೃದ್ಧೋಲ್ಕರೂಪೈರ್ಹೃದಯಾದಿಸಂಸ್ಥೈಃ 
ಪ್ರಾಣಾದಿಗೈರನ್ನಮಯಾದಿಗೈಶ್ಚ	||10||
ಇಲಾವೃತಾದ್ಯಾಮಲಖಂಡಸಂಸ್ಥೈಃ 
ಪ್ಲಕ್ಷಾದಿಸದ್ದ್ವೀಪಸಮುದ್ರಧಿಷ್ಣ್ಯೈಃ |
ಮೇರುಸ್ಥಕಿಂಸ್ತುಘ್ನಗಕಾಲಚಕ್ರ-
ಗ್ರಹಗ್ರಹಾನುಗ್ರಹಿಭಿಶ್ಚ ಲೋಕೈಃ	||11||
ನಾರಾಯಣೀಪೂರ್ವವಧೂರುರೂಪೈ-
ಸ್ತ್ರಿಧಾಮಭಿರ್ಭಾಸುರಧಾಮಭಿಶ್ಚ |
ಶ್ರೀಮೂಲರಾಮಪ್ರತಿಮಾದಿಸಂಸ್ಥ-
ಶ್ರೀರಾಮಚಂದ್ರಾಖಿಲಸದ್ಗುಣಾಬ್ಧೇ	||12||
ಸೀತಾಪತೇ ಶ್ರೀಪರಮಾವತಾರ 
ಮಾಬಾದಿಭಿರ್ಬ್ರಾಹ್ಮಮುಖೈಶ್ಚ ದೇವೈಃ |
ದಿಕ್ಪಾಲಕೈಸ್ಸಾಕಮನಂತಸೌಖ್ಯ-
ಸಂಪೂರ್ಣಸದ್ಭಕ್ತದಯಾಂಬುರಾಶೇ 	||13||
ಸತ್ಯಾಧಿರಾಜಾರ್ಯಹೃದಬ್ಜವಾಸ 
ಶ್ರೀಮಧ್ವಹೃತ್ಪಂಕಜಕೋಶವಾಸ |
ಮದ್ಬಿಂಬರೂಪೇಣ ಭವೈಕ್ಯಶಾಲೀ 
ಚಾಮಂತ್ರಿತಸ್ತ್ವದ್ಯ ನಮೋ ನಮಸ್ತೇ	||14||
ವರಾಕ್ಷತಾನ್ ಕಾಂಚನಮುದ್ರಿಕಾಶ್ಚ 
ಮಂತ್ರೇಣ ಹೇಮ್ನಶ್ಚಷಕೇ ನಿಧಾಯ |
ಸೀತಾಪತೇ ತೇ ಪುರತಶ್ಶ್ರುತೇಸ್ತು 
ಪ್ರದಧ್ಯುರೇವಂ ಭಗವತ್ಸ್ವರೂಪಂ	||15||
ಹಿರಣ್ಯರೂಪಸ್ಸಹಿರಣ್ಯಸಂದೃಗಪಾ-
ನ್ನಪಾತ್ ಸೇದು ಹಿರಣ್ಯವರ್ಣಃ |
ಹಿರಣ್ಯಯಾತ್ಪರಿಯೋ ನಿಷದ್ಯಾ 
ಹಿರಣ್ಯದಾದದತ್ಯನ್ನಮಸ್ಮೈ	||16||
ವಸಿಷ್ಯೋತ್ತಮವಸ್ತ್ರಾಣಿ 
ಭೂಷಣೈರಪ್ಯಲಂಕುರು |
ಕುರ್ವನ್ನುತ್ಸವಮತ್ಯಂತ-
ಮಸ್ಮದೀಯಂ ಮಖಂ ಯಜ	||17||
ವಸಿಷ್ವಾ ಹಿ ಮಿಯೇಧ್ಯ ವಸ್ತ್ರಾಣ್ಯೂರ್ಜಾಂಪತೇ 
ಸೇಮಂ ನೋ ಅಧ್ವರಂ ಯಜ |
ಆಮಂತ್ರಿತೋಽಸಿ ದೇವೇಶ 
ಪುರಾಣಪುರುಷೋತ್ತಮ |
ಮಂತ್ರೇಶೈರ್ಲೋಕಪಾಲೈಶ್ಚ 
ಸಾರ್ಧಂ ದೇವಗಣೈಃ ಶ್ರಿಯಾ	||18||
ತ್ರಿಕಾಲಪೂಜಾಸು ದಯಾರ್ದ್ರದೃಷ್ಟ್ಯಾ 
ಮಯಾರ್ಪಿತಂ ಚಾರ್ಹಣಮಾಶು ಸತ್ವಂ|
ಗೃಹಾಣ ಲೋಕಾಧಿಪತೇ ರಮೇಶ 
ಮಮಾಪರಾಧಾನ್ ಸಕಲಾನ್ ಕ್ಷಮಸ್ವ	||19||
ಶ್ರೀಮತ್ಸತ್ಯಪ್ರಮೋದಾರ್ಯ-
ಹೃನ್ನಿವಾಸ್ಯನಿಲೇಶಿತಾ |
ಸತ್ಯಜ್ಞಾನಾನಂತಗುಣಃ 
ಪ್ರೀಯತಾಂ ಬಾದರಾಯಣಃ 	||20||
|| ಇತಿ ಆಮಂತ್ರಣೋತ್ಸವಸ್ತೋತ್ರಂ ||